Аюбхон Камалов. Наманган вилояти ҳокимлиги матбуот хизмати фотосурати
Наманган халқ депутатлари Кенгашининг навбатдан ташқари сессиясида Аюбхон Камаловнинг Наманган шаҳар ҳокими лавозимига номзодини бир овоздан маъқуллади. Тайинлов Наманган вилояти ҳокимлиги матбуот хизмати томонидан эълон қилинди.
Шунингдек, депутатлар бир овоздан Анвар Отаходжаевни Наманган шаҳар ҳокими лавозимидан озод этишга овоз бердилар.
Сентябрь ойи бошида Отаходжаев порахўрликда гумон қилиниб ҳибсга олингани маълум бўлганди. Тергов маълумотларига кўра, ҳоким ер участкасини олишда ёрдам бергани учун маҳаллий тадбиркордан 60 минг доллар талаб қилган. Ўшанда амалдор ҳибсга олингани ва дарҳол депутатлик дахлсизлигидан маҳрум қилингани ҳақида хабар берилганди.
Ушбу лавозимга тайинланишидан олдин, Наманганнинг ҳозирги ҳокими Аюбхон Камалов 2020 йил декабридан бери Ўзбекистон Марказий банки (МБ) раисининг ўринбосари лавозимида ишлаб келган.
ℹ️ Аюбхон Камалов 1971 йилда Наманган шаҳрида туғилган, 1993 йили Ленинград қишлоқ хўжалиги институти, 2001 йили Наманган муҳандислик-педагогика институтини тамомлаган. У ўз меҳнат фаолиятини 1993 йили Наманган вилоят Истиқболни белгилаш ва статистика бошқармасида бошлаган. Кейин у 20 йилдан ортиқ банк ва молия тизимларида турли лавозимларда ишлаган.
2017−2019 йилларда Вазирлар Маҳкамаси ҳузуридаги тадбиркорлик фаолиятини ривожлантиришни қўллаб-қувватлаш давлат жамғармаси ижрочи директори, 2019 йилдан 2020 йилгача Наманган вилояти ҳокимининг иқтисодиёт ва тадбиркорлик бўйича биринчи ўринбосари лавозимида ишлаган. Марказий банкка ўтишдан олдин у Вазирлар Маҳкамасининг Макроиқтисодий таҳлил, молия-банк тизими, давлат активларини бошқариш, рақобатни бошқариш, тадбиркорликни қўллаб-қувватлаш ва камбағалликни қисқартириш масалалари котибиятини бошқарган.
