Александер Стубб ва Қосим -Жомарт Тўқаев. akorda.kz сайти фотосурати
Қозоғистон Европа мамлакатлари учун энергетика соҳасидаги ҳамкорликда Россияга муқобил вариант бўлиши мумкин. Финляндия президенти Александер Стубб бу ҳақда Казинформ давлат ахборот агентлигига берган интервьюсида маълум қилди.
«Европа аста-секин Россия энергия таъминотидан — суюлтирилган табиий газ (LNG) ва нефтдан — узоқлашаётган ва бу ерда етказиб бериш 80% дан камайган бир пайтда муқобил энергия манбаларига эҳтиёж туғилади. Бу борада Қозоғистон муҳим рол ўйнайди», — деди Стубб, Европа Иттифоқи республиканинг энг йирик савдо шериги эканини эслатиб ўтаркан.
Стубб шунингдек, Хельсинки учун Президент Қосим-Жомарт Тўқаевдан Қозоғистон билан улкан чегарага эга Россия ва Хитойга оид «вазиятни таҳлил қилувчи ва баҳоловчи таҳлилларни олиш жуда қадрли эканини» таъкидлади.
«Финляндия ва Қозоғистон каби ўрта ва кичик давлатларнинг қадриятлари ва манфаатлари бор, аммо уларнинг кучи чекланган. Одатда, бу йирик ўйинчиларнинг ваколати, шунинг учун биз иккинчи даражали рол ўйнашимиз мумкин.
Биз воситачилар сифатида иштирок этишимиз, муҳокама қилишимиз ва хабарларни етказишимиз мумкин. Масалан, Президент Тўқаев келаси ҳафта Оқ уйга, ундан сўнг дарҳол Кремлга ташриф буюради. Бу президент Трамп ва президент Путиндан тегишли маълумотларни олиш ва уни бошқа томонларга етказиш учун ажойиб имкониятдир. Мен ҳақиқатан Финляндия ҳам, Қозоғистон ҳам муҳим рол ўйнашига чин дилдан ишонаман», — дея хулоса қилди Стубб.
Финляндия президенти Тўқаевнинг таклифига биноан 28-29 октябрь кунлари расмий ташриф билан Остонада бўлди. Музокаралар давомида икки раҳбар мамлакатлар ўртасидаги ҳамкорлик, хусусан, ядро энергиясидан тинчлик мақсадларида фойдаланиш бўйича 15 та ҳужжатни имзоладилар.
