krasrab.ru сайти фотосурати
Жиноят ишлари бўйича Қамаши туман суди Қашқадарё вилоятида туғилган 40 ёшли Р.И.ни ёлланиш моддаси бўйича айбдор деб топиб, тўрт йиллик озодликни чеклаш жазосига ҳукм қилди. Бу ҳақда UzNews.uz суд ҳукмига таяниб хабар берди.
Суд ҳужжатларига кўра, Россияда бўлганида Р.И. маҳаллий аёлга уйланган ва 2015 йили Россия паспортини олган. У Ўзбекистон фуқаролигини сақлаб қолган.
2023 йилдан бошлаб у Россиядан ташқарига чиқиш учун бир неча бор хориж паспортини олишга уринган. 2025 йил март ойида миграция хизмати ходимлари унга паспорт фақат ҳарбий хизматга рўйхатдан ўтгандан кейингина берилишини тушунтиришган.
Р.И.нинг сўзларига кўра, у ҳарбий комиссариатда соғлиғи билан боғлиқ муаммолар ва жанг қилиш истаги йўқлигини айтган. Шунга қарамай, уни Приморск ўлкасида жойлашган ҳарбий қисмга мажбуран юборишган.
Хизмат пайтида эркак уни Украинадаги жанговар зонага жўнатишга тайёрлашаётганларини тушуниб етган. У қўмондонликка чурраси борлиги айтган. Шундан сўнг уни ҳарбий госпиталга юборишган. Госпиталда уни операция қилишган, шундан сўнг Р.И. ўз ҳарбий қисмига қайтмасдан, берухсат бу ерни тарк этган ва 9 июль куни Ўзбекистонга қайтиб келган.
Қайтиб келгач, Р.И. ихтиёрий равишда Қашқадарё вилояти Давлат хавфсизлик хизматига (ДХХ) мурожаат қилган. У пушаймон экани тўғрисида ариза ёзган ва Россия томонидан эълон қилинган махсус ҳарбий операцияда (МҲО) иштирок этганини тасдиқловчи ҳужжатларни тақдим қилган.
Иш материалларини кўриб чиққандан сўнг, суд Р.И.ни Ўзбекистон Жиноят кодексининг 154-моддаси 1-қисми («Ёлланиш») бўйича айбдор деб топган ва иш ҳолатларини ҳисобга олган ҳолда унинг эркинлигини вақтинча чеклаган.
ℹ️ «Фарғона» Ўзбекистонда ёлланиш моддаси бўйича жиноий ишлар қўзғатилаётгани ҳақида бир неча бор ёзган. Масалан, шу йилнинг октябрь ойида 55 ёшли наманганлик фуқаро Россия Мудофаа вазирлиги билан шартнома имзолаган ва Россия армиясида хизмат қилгани учун икки йилга озодликдан маҳрум қилинган. Бундан олдин Бухоро вилоятида туғилган 32 ёшли фуқаро Луганск вилоятидаги жанговар ҳаракатларда иштирок этгани учун беш йилга озодликдан маҳрум қилинган. Сурхондарёлик 25 ёшли йигит сўзларига кўра, ундан «депортация ҳужжати» ўрнига Россия армияси билан шартномани имзолатиб олишган ва шундан сўнг Украинага юборишган. Йигит уч йилга озодликдан маҳрум қилинган.
Шу йилнинг ноябрь ойида Давлат хавфсизлик хизмати 2022 йилдан бери Ўзбекистонда фуқароларнинг хориждаги қуролли можароларда иштирок этганига доир 338 та жиноий иш қўзғатилганини хабар қилди.
