Марко Рубио самолёт зинапоясидан тушмоқда. UzA фотосурати
18 октябрь куни кечқурун АҚШ Давлат котиби Марко Рубио Самарқандга етиб келди, деб хабар беради UzA. Уни аэропортда Ўзбекистон президенти Администрацияси раҳбари Саида Мирзиёева ва бошқа расмий шахслар кутиб олди. Рубио «Марказий Осиё — АҚШ» (C5+1) форматидаги Ташқи ишлар вазирлари учрашувида иштирок этиш учун келди.
АҚШ Давлат котиби мамлакатга рафиқаси билан бирга учиб келди. Бу унинг Марказий Осиёга илк ташрифидир. Самарқандга президент Шавкат Мирзиёев ҳам келди. У Рубио билан музокаралар ўтказади ва Ишбилармонлик кенгаши йиғилишида иштирок этади.
Душанба куни Самарқандда Америка — Ўзбекистон ишбилармонлик ва инвестициялар кенгашининг иккинчи йиғилиши бўлиб ўтади. Унинг ҳамраислари — Саида Мирзиёева ва Серджио Гор. UzA маълумотларига кўра, тадбирда иштирок этиш учун 200 дан ортиқ америкалик тадбиркор келган. Нашр буни АҚШ бизнесининг Ўзбекистонга қизиқиши ортиб бораётганидан далолат деб ҳисоблайди. Шу куни C5+1 учрашуви ҳам бўлиб ўтади. Бундан ташқари, Рубио ва Ўзбекистон Ташқи ишлар вазири Бахтиёр Саидов икки мамлакат ўртасидаги кенгайтирилган стратегик шериклик бўйича мулоқотнинг биринчи раундини ўтказади.
Ташриф ҳақида олдиндан маълум қилинган эди. «Фарғона» нашри АҚШ Давлат департаментига таяниб хабар берганидек, сафар 17 октябрдан 22 октябргача давом этади. Умумий учрашувдан ташқари, Рубио минтақанинг барча беш давлати — Ўзбекистон, Қозоғистон, Тожикистон, Туркманистон ва Қирғизистоннинг юқори мартабали вакиллари билан икки томонлама музокаралар ўтказишни режалаштирган. Самарқанддан кейин Давлат котиби Ҳиндистонга йўл олади. У ерда Мумбай ва Жамнагар шаҳарларида учрашувлар ўтказиши режалаштирилган.
C5+1 формати 2015 йилдан буён фаолият юритиб келади. Илк вазирлар учрашуви айнан Самарқандда бўлиб ўтганди. Яқинда мазкур формат энг юқори даражага кўтарилди. 2025 йил 6 ноябрда Вашингтонда Дональд Трамп ва минтақанинг беш давлати раҳбарлари иштирокида C5+1 форматидаги иккинчи саммит бўлиб ўтганди.
UzA нашрининг баҳолашича, жаҳон оммавий ахборот воситалари ушбу ташрифни Вашингтоннинг минтақа давлатлари билан иқтисодий алоқаларни кенгайтириш ва стратегик шерикликни мустаҳкамлашга интилиши билан боғламоқда.
