Омурбек Бабанов. ҚФИ фотосурати
Қирғизистон футбол иттифоқи (ҚФИ) Олий лига клубларининг мурожаатлари ва «Азия» футбол клуби президенти, ҚФИ Ижроия қўмитаси аъзоси Омурбек Бабанов ташаббусидан сўнг легионерларга қўйиладиган лимитни кучайтириш бўйича аввал қабул қилинган қарорини қайта кўриб чиқди. Бу ҳақда ташкилот матбуот хизмати хабар берди.
Бабанов хорижлик футболчиларга нисбатан амалдаги чекловларни бутунлай бекор қилишни таклиф қилди. Масала 26 октябрь куни ҚФИ Ижроия қўмитаси аъзолари ва Олий лига клублари раҳбарлари иштирокидаги йиғилишда муҳокама қилинди.
Учрашув якунларига кўра, Ижроия қўмитаси клубларнинг умумий позициясини қўллаб-қувватлади. 2027 ва 2028 йилги мавсумларда 7/4 схемаси амал қилишда давом этади: майдонда бир вақтнинг ўзида еттитадан ортиқ легионер ва Қирғизистон фуқаролигига эга камида тўрт нафар футболчи бўлиши мумкин эмас.
Шу тариқа, ҚФИ легионерлар лимитини босқичма-босқич кучайтириш бўйича аввал режалаштирилган қароридан воз кечди. Ижроия қўмитасининг 12 октябрдаги қарорига мувофиқ, майдондаги легионерлар сони ҳар йили биттага камайтирилиши, Қирғизистон футболчилари сони эса биттага оширилиши керак эди. Хусусан, 2027 йилда олтита легионер ва бешта маҳаллий футболчига, 2028 йилда эса тегишлича бешта легионер ва олтита маҳаллий футболчига рухсат берилиши режалаштирилган. 2029 йилда бу нисбат тўрт нафар легионер ва етти нафар маҳаллий футболчини ташкил этиши керак эди.
Амалдаги низомга кўра, Олий лига клублари бир мавсум учун таркибига ўн нафаргача легионерни киритиши мумкин. Евроосиё иқтисодий иттифоқининг бошқа давлатлари — Арманистон, Беларусь, Қозоғистон ва Россия фуқаролари эса Қирғизистонда легионер ҳисобланмайди.
Омурбек Бабанов — Қирғизистоннинг собиқ Бош вазири ва 2026 йилги мавсумда Олий лигада илк бор иштирок этган Таласнинг «Азия» футбол клуби президенти. Жамоанинг бош мураббийи — Ўзбекистон терма жамоасининг собиқ ҳужумчиси Максим Шацких.
Transfermarkt маълумотларига кўра, «Азия» таркибида 11 нафар хорижлик футболчи бор. Уларнинг бири — беларуслик дарвозабон Роман Степанов — ЕОИИга аъзо давлат фуқароси бўлгани учун легионерлар лимитига кирмайди. Шу тариқа, ҚФИ низомига кўра, клубнинг ўн нафар хорижлик футболчиси легионер ҳисобланади.
2026 йил баҳорида Камчибек Ташиев лавозимидан кетганидан сўнг Қирғизистон ОАВларида Бабанов ҚФИ президенти лавозимига эҳтимолий номзодлардан бири сифатида тилга олинган эди. Бироқ, 15 апрель куни бўлиб ўтган конгрессда иттифоқ раҳбари лавозимига расман номзодлар кўрсатилмади ва сайловлар қолдирилди. Ўшанда Бабанов ҚФИ Ижроия қўмитасининг янги таркибига кирди. 12 май куни Қирғизистон Вазирлар Маҳкамаси раиси Одилбек Қосималиев иттифоқ президенти этиб сайланди, Бабанов эса Ижроия қўмитасидаги ўрнини сақлаб қолди.
