Пўлат Бобожонов. Ўзбекистон Ички ишлар вазирлиги матбуот хизмати фотосурати
Ўзбекистон президентининг кадрлар масалалари бўйича маслаҳатчиси ўринбосари Пўлат Бобожонов эгаллаб турган лавозимидан озод этилди. Тегишли фармонни республика раҳбари Шавкат Мирзиёев имзолади, деб хабар беради унинг матбуот котиби Шерзод Асадов.
Қайд этилишича, давлат раҳбари Администрациясида ишлашидан олдин узоқ йиллар Ички ишлар вазирлигини бошқарган Бобожонов бошқа ишга ўтиши муносабати билан лавозимидан озод қилинган. Мулозимнинг айнан қайси лавозимга тайинлангани ҳозирча маълум эмас.
Асадовнинг қўшимча қилишича, қарор президент Администрацияси тузилмасини оптималлаштириш бўйича ишлар доирасида қабул қилинган. Хусусан, кадрлар масалалари бўйича маслаҳатчи лавозими ва унинг бўлинмаси энди тугатилди.
Кадрлар масалалари бўйича маслаҳатчи лавозимида Гафуржон Мирзаев ишлаган. Президент уни республика Бош вазири ўринбосари — Ўзбекистон Маҳаллалари уюшмаси раиси лавозимига тайинлади.
ℹ️ Пўлат Бобожонов 1961 йилда туғилган. Узоқ йиллар Бош прокуратура тизимида ишлаган, беш йил давомида назорат органи раҳбари ўринбосари лавозимини эгаллаган. 2012 йилдан Хоразм вилояти ҳокими бўлган, 2017 йилда эса Ички ишлар вазири этиб тайинланган. Генерал-лейтенант. 2025 йил март ойида Ички ишлар вазири лавозимидан озод этилган, унинг ўрнини Азиз Ташпўлатов эгаллади. Бобожонов эса президентнинг кадрлар масалалари бўйича маслаҳатчиси ўринбосари лавозимига тайинланган эди.
