gov.kz сайти фотосурати
Халқаро атом энергияси агентлиги (ХАЭА) Қозоғистоннинг атом электр станцияларини қуриш учун зарур бўлган ядровий инфратузилмасини комплекс баҳолашга тайёргарликни бошлади. Бу ҳақда Қозоғистон Атом энергияси агентлиги хабар берди.
12–15 октябрь кунлари Остонада ХАЭА миссияси бўлиб ўтмоқда. Унинг мақсади Қозоғистонга ядровий инфратузилманинг ўзини ўзи баҳолаш ҳисоботини тайёрлашда ва INIR (Integrated Nuclear Infrastructure Review) комплекс баҳолаш асосий миссиясига тайёргарлик кўришда ёрдам беришдан иборат.
«Ҳамкорликдаги ишнинг асосий мақсади — экспертларнинг ўзини ўзи баҳолаш ҳисоботи бўйича таклифларини муҳокама қилиш, тақдим этилган маълумотларга аниқлик киритиш ҳамда INIR миссиясига тайёргарлик кўриш бўйича кейинги қадамларни белгилаш», — дейилади агентлик хабарида.
Дастур 19 та йўналишни қамраб олади. Улар орасида ядровий ва радиациявий хавфсизлик, ядровий объектларнинг жисмоний ҳимояси, қонунчилик ва тартибга солиш, молиялаштириш, мутахассислар тайёрлаш, манфаатдор томонлар билан ҳамкорлик, электр тармоқларининг тайёрлиги ҳамда ядровий ёқилғи цикли бор.
Ишда ХАЭА экспертлари, Қозоғистон Атом энергияси агентлиги, «Қозоғистон атом электр станциялари» компанияси ва «Қазатомпром» миллий атом компанияси вакиллари иштирок этмоқда.
Қозоғистон бир нечта атом электр станциясини қуришни режалаштирмоқда. Биринчи АЭС — «Балхаш» станциясини Олмаота вилоятидаги Улкен қишлоғида жойлаштириш кўзда тутилган. Станция қурилиши бўйича халқаро консорциумга Россиянинг «Росатом» компанияси раҳбарлик қилиши белгиланган. 3 сентябрь куни Қозоғистон ушбу компаниянинг таркибий тузилмаси бўлган «Атомстройэкспорт» билан АЭСни лойиҳалаштириш, етказиб бериш ва қуриш бўйича шартнома имзолади. Лойиҳа қиймати тахминан 16,4 миллиард долларга баҳоланмоқда.
Иккинчи станция учун ҳам мамлакат жануби — Олмаота вилоятининг Жамбил тумани танланган. Ушбу лойиҳада устувор пудратчи сифатида Хитойнинг CNC компанияси кўриб чиқилмоқда. Қуввати кичик ва ўрта бўлган реакторларга эга учинчи станцияни жойлаштириш учун эса Ғарбий Қозоғистондаги Каспий денгизи соҳили кўриб чиқилмоқда.
